Бөгүн Тыва Республиканың башкыларының чөвүлел хуралы болуп эрткен. Регионнуң башкылары янзы-бүрү шөлчүгештерниң ажылынга киришпишаан, өөредилге адырында сорулгаларны болгаш актуалдыг айтырыгларны сайгарып чугаалашкан. Оон аңгыда хуралга чаа өөредилге чылының планын дөзевилээн. Ол ышкаш чөвүлел хуралга өөредилге системазының чаарттынып турар инфраструктуразын чугаалашкан: республиканың аңгы-аңгы кожуун-сумуларында чаа школалар база уруглар садтары туттунгулаан.
«Республикада өөредилге адыры күрүне программаларын амыдыралда чедимчелиг боттандырып турар. Башкыларны көдээ школаларже хаара тудар болгаш оларның профессионал мергежилин бедидери-биле, «Көдээ черниң башкызы» федералдыг программа, «Мээң башкым» республика программазы болгаш Тываның Өөредилге яамызының янзы-бүрү төлевилелдери, программалары ажылдап турар» - деп, август хуралының байырлыг кезээнде Тываның Баштыңы Владислав Ховалыг демдеглээн.
Өөредиглиг шөлчүгештерниң кол темаларынче бо хүнгү актуалдыг айтырыглар кирген: «Өөредилгениң шынарын бедидери регионалдыг өөредилге адырының хөгжүлдезинде кол угланыышкын», «Башкыларның профессионал мергежилин үзүктел чок бедидеринге методиктиг албанның ролю», «Ада-ие биле школаның аразында сырый харылзаа кижизидилгениң эффектилиин бедидер кол негелде» дээш оон-даа өске.
Милана Кыргыс, Тес-Хем кожууннуң Самагалтай суурунда «Аян» уруглар садында кижизидикчи башкы, 2024 чылда «Чылдың кижизидикчи башкызы» мөөрейниң тиилекчизи:
- Бөгүн бо кайгамчыктыг хүнде башкы эш-өөрүмге чаа өөредилге чылының эгелээни-биле байыр чедирип тур мен. Республика чергелиг чөвүлел хуралда бир дугаар киржип тур мен. Ооң мурнунда чылдарда чүгле кожууннуң хуралдарынга киржир турдум. Яамының эрттирип турар хуралында киржип келгенимге өөрүп тур мен. Шупту башкылар төлептиг, хүндүткелдиг кижилер дээрзи чугаажок, олар чурттуң быжыг туруштуг хамаатыларын өөредип, кижизидип турарлар.
https://vk.com/minobrtuva?w=wall-38636573_45837&ysclid=m06w9vp2be944228202