Начын мөге Сергелең Ондар хүрешке маргылдаа эрттирген
Бөгүн, июнь 10-да, Кызылда Владимир Биче-оол аттыг стадионга Сергелең Ондар-оолович Ондарның ТР-ниң Начын мөгези хүндүлүг атты болгаш РФ-тиң эң шылгараңгай дайынчы шаңналы – Эрес-дидим чорук орденни алганынга тураскааткан тыва хүреш маргылдаазы болуп эрткен.
Анаа 80 ажыг мөге киришкен. Оларның аразында ТР-ниң Чааннары, Арзылаңнары, Начыннары дээш, шыырак мөгелер-ле хөй болган.
Хүрештиң байырлыг ажыдыышкынының эгезинде маадырлыг чоруу дээш Сергелең Ондарга Росгвардияның 3 аңгы медалын тывыскан.
Дээди Хуралдың депутаттары Елена Ховалыг биле Сергей Куулар маргылдааның хүндүлүг аалчылары болганнар. Тыва парламентиниң база бир депутады – ТР-ниң Арзылаң мөгези Седен-Очур Кара-Сал маргылдаага хүрешкен.
Дээди Хуралдың Даргазы Кан-оол Давааның Сергелең Ондарга байыр чедириишкинин Сергей Куулар дамчыткан. «Силер, тыва чоннуң ынак мөгези – республиканың спортчу чоргааралы силер. Улуг маргылдааларга чедиишкиннериңер-биле дээди хүндүткелдиг Начын мөге атты чаалап алгаш, ону төлептиг эдилеп чор силер.
Албан ажылыңар аайы-биле Тускай шериг операцияга баштайгы хүннерден эгелээш коргуш чок, маадырлыы-биле кириштиңер. Амгы үеде бистиң аравыста чорууруңар, ынак спортуңар – тыва хүрешти суртаалдап турарыңар дээш база өөрүп турар бис» - деп байыр чедириишкининде бижээн. Сергей Куулар чугаазын доозуп тура, Сергелең Ондарга быжыг кадыкшылды, менди-чаагай чорукту, амыр-тайбың амыдыралды, аас-кежикти, а ол ышкаш бедик хей-аътты, сүлде-сүзүктү күзээн.
